Hawaii 7.6. - 24.6.13

Nacheme lange und astrengende Flug simer entlich in Hawaii acho! Mir hend eus riesig 

uf hoffentlich schöns wetter gfreut =)

Mir sind zerst 6 Täg uf de Maui Insle gsi, mir hend s Auto entgege gno und sind uf de Weg

zu eusere Wohnig! D'Wohnig isch eifach klasse gsi! Als würsch ine iigrichteti fertigi Wohnig

ine laufe! Es het eifach alles dine gha womer brucht! Den hemer zerst mal alli Kleider gwäsche

vode fitschi und sind scho gli ga schlafe… Am nechste Tag simer in Tauchschop wel mir unbedingt

eusi Tauchprüefig hend wele fertig mache! Den hemer doch am nechste Tag scho  chöne afange!

Am Namittag simer de Küste entlang gfahre alles am Meer nah, es isch eifach wunderschön gsi…

Meer --> Sand --> Strass =)

Den simer bis zumene Blowhole ufe gfahre. Das isch sones Loch wo im Stei ine isch und wen e grossi

Wälle chunt sprützt s Wasser ufe, gseht mega cool us!!

Am nechste Tag simer ga Tauche! Mir sind so nervös gsi welmer zum erste mal en Scooter dive gmacht hend!

Da nimsch sones Scooter mit motörli (chasches ufem foti aluege =)) zwüsched bei wo dich duet stosse,

sprich du muesch nid padle mit de bei was eifach nur super isch =)

Bi dem Tauchgang hemer mindestens 10 riisigi Schildchrote gse, hui het Tanja freud gha!!

Am Abed simer en wunderschöne Sunneuntergang ga luege ufem 3'000 Meter höche

Haleakala Berg! Leider hend mir nid erwarted dases in Hawaii uf 3'000 Meter au

chenti chalt sii… Es isch aso A…chalt gsi… Aber zum glück gits in Hawaii sooo liebi Taxi fahrer

wo für genau so turiste na es paar warmi chleider im Taxi hend… =) Jaaa er het eus ikleidet und mir sind 

uh mega froh gsi, es chan bis -15 grad si aber mir hend glück gha das de Wind vo de andere siite cho isch 

und eso nur +10 gsi isch!! Es isch mega schön gsi! Du hesch de Sunneuntergang überem Wulchemeer gse… Einmalig!

Den hemer di berüehmti Road to Hana gmacht! Die isch au wunderschön gsi, het uh viel Wasserfäll unterwegs!

Am nechste Tag isch na eusen letschte Tauchtag gsi! Det simer mitem Boot use zum Molokini. Das isch en 

Vulkan mal gsi wo jetzt im und unter Wasser isch. So e gueti sicht we det, hemer aso na nie gha!!

Du hesch sicher bis zu 30 meter wiit gse und es isch eifach super gsi!! Und den Zag hemer eusi prüefig im Sack!

Juhuu mir sind so froh gsi! Mir hend sogar möse lerne für das… Und das ide Ferie… =)

Sooo und den isches wiiter gange uf di nechst Insle und zwar uf Big Island!

Uf de Big Island simer en Vulkan und en Vulkan und sogar na en Vulkan ga aluege =)

Dasers alli schnell wüssed Big Island isch di gröscht Hawaii Insle und isch ganz früener nur en Vulkan gsi!

Das heisst das isch eich d Hauptattraktion det =)

Mir sind aso uf de Vulkan ufe und hend de riisig Krater gseh wo mega usegraucht het! Isch mega iidrücklich

zum sowas mal live derfe z gse! Den simer i dem Nationalpark umegfahre bismer zunere Strass cho sind

wo gsperrt gsi isch, wel det vor ca. 10 Jahr d Lava über d Strass gloffe isch. Das hend mir eus natürli nid entgah 

lah und sind hindere gloffe! Was mir gseh hend, hend mir fasch nid chöne glaube… Das het so schön usgseh…

Mer chan sich das gar nid vorstelle wie viel muen abecho dases alles abdeckt.

Wo mer wiit hindere glueged hend, 

hend mir gseh das bim Meer ganz viel Rauch ufe chunt und hend ghört das de Vulkan immerna Aktiv isch und det

d Lava is meer lauft. "Das müemer gseh" hemer denkt!! Mir hend eus entschlosse zum e Tour z mache das mer das

gsend. Mir sind also mitem Helikopter gange und es het echt einmalig usgseh! Mer chan das gar nid beschriebe, mer

muen das eifach gse ha wen mer det isch!

Den simer mal am abig nomal zum Krater ufe und mer het na viel besser gseh das de Vulkan aktiv isch! De rauch wo 

ufgstiege isch, isch richtig rot gsi und zum Teil isch Lava ufegsprützt!

Nach 5 Täg Vulkan aluege isches leider scho uf eusi letscht Insle wiiter gange und zwar uf Kauai!

Kauai isch Weltklasse gsi! Mir sind leider nur 5 Nächt det gsi aber mir hends mega gnosse!

Womer acho sind, simmer wie immer euses Auto ga schnappe und los gfahre zu eusem

Appartment. Hei isch das Appartment geil gsi! Mit abstand s schönste womer gha hend!

Mir hend jede morge ufem Balkon mit Meersicht und Meeresrusche gmüetlich Z'mörgelet!

In Kauai simer hauptsächlich Stränd ga aluege. Aber die sind alli wunderschön gsi! EIne nachem 

andere… Den hemer gseh dases na en Canyon het und das hemer natüli nid verpasst! 

De Canyon isch entstande dur es Erdbebe wos mal gha hend, wo anschiinend fasch d Insle

usenand grisse het… Aber de isch den idrücklich gsi du uuuiiii… Wie im Bilderbuech…

Amene andere Tag simer ga Wasserfäll aluege. Eine womer gseh hend isch na en Berüehmte gsi,

det hends scho es paar Film trüllet aber die sind scho wieder furt gsi wo mir cho sind =)

Es isch eifach wunderschön gsi und wie seit mer so schön, me sel ufhöre wens am schönste isch…

Das hemer den au leider möse mache dasmer hend chöne wiiter uf San Francisco =)

Aber Hawaii-weh hemmer scho jetzt…

Euses Fazit: Mer het s schönste vo Amerika nid gseh, wen mer nid uf Hawaii gsi isch!!!