Eusi wunderbar Weltreis =)
Sydney - Carins 3.3. - 3.4.13
(Chasch au eifach d Fotene aluege wens di aschisst lese =) )
Eusi erscht lang Reis vo Sydney uf Cairns het agfange. Di erschte 5 täg simer Sydney ga erkunde!
Mir sind natürli s Opere huus ga aluege, den simer is Madame Taussand und eifach chlli ide Stadt umegschlenderet.
Den nach dene 5 Täg hend mir eus riisig uf eusen Hippie Camper gfreut!!
Doch wo mir bide Vermietstation acho sind hemer zerscht 4 stunde möse warte uf euses Auto…
Zerscht hets gheisse euse Camper segi noned da… Den ischer cho und den hendsen na zerscht möse wäsche…
Eso isches den na öppe 2 Stunde wiiter gange… Doch nach 4 Stund isch si doch cho und het eus gseit
dass euse Camper jetzt parat isch! WOW so guet!
Den womer use sind staht doch plötzlich sonen grosse Apollo vor de Türe, riiiisigi Auge hemer gmacht.
Mir hend eus so greut dasmer es gratis upgrade becho hend und sind natürli gad abgfätzt nid das si sich na
andersch überleged und de eus na weg nemed, wer ja schad =)
Den isch d Reis losgange! Mir sind duruf gfahre und hend eus zerscht mal de erschti Campingplatz gsuecht.
Den simer vo dörfli zu dörfli gfahre und sind natürli immer die schöne Stränd ga aluege! Leider sind aber
d Stränd nid so schön gsi wels churz bevor mir cho sind ja die Unwetter gha het mit mega Überschwemmige…
Sie hend mega viel Strasse arbeite gha und so simmer nur langsam vorwerts cho. Au ade Stränd ah hesches
gse… Sie sind mega verwüeschtet gsi und s het mega viel sache gha wo umeglege sind…
Mir hend eus uf de Weg gmacht richtig Gold Coast, Surfers Paradise, und det hemer na en Schuelkolleg troffe,
womer in Perth kenneglernt hend.
Aber mir hend die Gold Coast nid so speziell gfunde, wahrschindli halt wegem
Unwetter… Den simer mal bi Bundaberg verbii cho, de Ort hets glaub vode Überschwemmige am meiste betroffe…
D hüüser sind mega kabutt gsi und s Wasser isch au noned recht abgloffe gsi… In Bundaberg wird de bekannti
Rum braut, natürli het de Herr Vontobel gad e Fläsche möse chaufe. Tanja het si chotz grusig gfunde =)
Irgendwen simer amene Ort namens Bowen verbii gfahre, hui tanja het sich gad verliebt, so ala liebe auf den ersten Blick =)
Nei das isch mega schön gsi!!! Det hets so herzigi schöni Stränd gha und en Berg wo über alles ine gse hesch.. <3
Den simer ufd Whitsunday Island, das isch eifach es paradiis uf Erde… Mir hend e Tagestour bueched und sind mitem Boot use gfahre.
Den simer det ufen Usblick und hend derfe Katalogfotene mache… Eifach Traumhaft gsi, die farbe und de wiissi Sand…
Was mega luschtig gsi isch, mer het det nid eifach so derfe ga bade, nei mer het möse en ganze azug alege weg de Qualle.
Die Qualle wos hend sind echt mega gfährlich, bide einte bisch nach 3 minute scho tot…
Aber das het sooo doof usgse, hesch usgse we sonen Ninja, sonen hässliche azug a dem geile Strand… =)
Aber das isch en wunderschöne Tag gsi!!!
Den hemer denkt mir sind gnueg früeh in Cairns obe dasmer na eusi Tauchprüefig chönd fertig mache, aber
leider isch alles scho usbueched gsi… Aso hemer hald eifach en Tagesusflug gmacht as Great Barrier Reef
und sind defür na in Regewald ein Tag.
S Tauche isch mega schön gsi, mir hend Haie, Schildchrote, Koralle, fisch, fisch und uh viel fisch gse =)
D Regewald Tour isch au de hammer gsi! Mir hend sonen coole Guy gha =)
Mir sind mega viel Wasserfäll ga aluege und hend mega viel cools erlebt!!!
Den de letschti Tag hemer demit verbracht zum s Auto putze dasmers den wieder suuber chönd abgeh…
Und eusi Vorfreud uf Neuseeland isch riisig gsi, eifach zum mal en wechsel zha!
Euses Fazit: Du wirsch definitiv vorher vome Auto überfahre weder vonere schlange bisse, vomene Hai gfresse, vonere spinne bisse oder vo susch öppis Giftigem gno = Mir hend Australie überlebt!!! =)
